Fundashon Kas Popular (FKP) i Ministerio di Tráfiko, Transporte i Planifikashon Urbano (VVRP) a presentá huntu un programa inovativo pa redusí e falta di kas na Kòrsou den un manera struktural. E inisiativa ku yamá ‘Mi Kas Awor’ ta kombiná solushon inovativo pa bibienda pagabel ku desaroyo ekonómiko i progreso sosial, ku énfasis riba sostenibilidat i inklushon.

Programa Mi Kas Awor:
E programa ta enfoká riba konstrukshon di kas pagabel, sostené pa un programa di subsidio di kompra ku ta aseptabel pa hende ku entrada abou i mediano. Esaki ta un modelo úniko ku ta duna un famia e oportunidat pa kumprá nan propio kas ku gasto mensual komparabel ku un hür.

Impakto Ekonómiko i Kreashon di Trabou:
E programa ta duna un estimulo na e ekonómia di Kòrsou:
• Trabou: Ku e kreashon di 19,175 trabou direkto i indirekto, e programa ta generá un suma di salarionan di NAf 698 mion anual.
• Kesemenry di Produkto Interno Bruto (BBP): E programa ta añadi NAf 305 mion pa BBP anual, stimulando kresementu den diferente sektor.
• Benefisio fiskal: Mirando ku ta hasi eksonerashon di OB i impuesto riba material di konstrukshon i teknologia, den 60 aña e programa lo generá un balansa positivo di NAf 550 mion na entrada fiskal.

Kontribushon pa Eliminá Pobresa i Koheshon Sosial:
E programa di subsidio di kompra ta yudá famianan pa formá rikesa i logra stabilidat finansiero. Esaki ta duna un solushon struktural pa eliminá pobresa, krea un kalidat di bida mihó i fortifiká koheshon sosial.

Sostenibilidat i Kalidat di Bida:
E programa ta integrá métodonan di konstrukshon sostenibel i solushon ku ta respetá medioambiente. E proyektonan di bibienda lo tin fasilidat esensial, espasio hopi berdè i akseso pa transporte públiko, ku lo kontribuí na un ambiente bibabel i inovativo.

Un Bista Kompartí:
Minister di VVRP, Charles Cooper: “Ku e programa aki, nos ta hasi un paso importante pa solushoná e falta di kas i krea un futuro sostenibel pa nos komunidat. Esaki ta un ehèmpel di kooperashon efisiente entre gobièrnu i organisashonnan públiko.”

Arthur Con, Direktor di FKP: “Mi Kas Awor ta un kontesta strategiko pa e desafio mas grandi di Kòrsou: falta di kas, desigualdat ekonómiko i progreso sosial. Huntu ku e ministerio di VVRP, nos ta komprometé pa realisá e bista aki.”

Sosten di Gobièrnu:
E programa ta buska un invershon di NAf 15 mion anual, ku lo subi pa NAf 27 mion despues di 2030. Ku esaki, e programa por redusí e falta di kas den 8 pa 10 aña i yudá mil famianan haña akseso pa un bibienda digno.