Willemstad, Kòrsou – Durante di un evento ekstraordinario pa ku futuro di bibienda na Kòrsou a lansa Mi Kas Awor.

Mi Kas Awor ta un programa ku tin komo meta transformashon di maneho di bibienda na Kòrsou i sinkronisá esaki ku e “Best Practices” riba nivel internashonal.

Durante di e evento, ekspertonan ku ta kana dilanti riba e tereno di bibienda pa pueblo a presentá nan análisis i rekomendashonnan pa fortalesé e aserkamentu inovativo aki, ku énfasis riba e impakto sosial i ekonómiko di e programa.

Un futuro vishon pa biba na Kòrsou

E dia a start ku un diskurso prinsipal di Jorge Torres, ekonomista na Lambda Soluciones de Consultoría. El a habri ku un análisis profundo di e aktual merkado di bibienda na Kòrsou. Torres a enfatisá ku ounke e supsidio di bibienda individual (Individuele Huursubsidie) ta eksistí pa mas ku 40 aña, instrumentonan di maneho nobo ta nesesario pa kumpli ku e demanda kresiente pa bibienda pagabel.

El a mustra riba e retonan pa finansiamentu, défisitnan den presupuesto i akseso limitá na bibienda pagabel. Aktualmente, e demanda kresiente di bibienda ta alkansá mas ku 8.834 kas, un kantidat ku ta sigui krese anualmente debí na kresementu di e poblashon. Esaki ta enfatisá e nesesidat pa oumentá e produkshon di bibienda pagabel pa kumpra i no pa hür, ku atenshon spesífiko pa e gruponan di entrada mas abou.
Torres a basa su análisis riba datonan di vários instituto na Kòrsou, entre otro Ofisina Sentral di Estadístika (CBS), Banko Sentral di Kòrsou i Sint Maarten (CBCS), Fundashon Kas Popular (FKP) i tambe datonan internashonal di Banko Mundial. E datonan aki a duna un bista profundo riba e problemanan di bibienda riba nos País.

A base di e evaluashon ekstenso aki, a desaroyá e programa Mi Kas Awor, un strategia ku ta konsistí di kuater programa dirigí i diseñá pa aktua konforme e nesesidatnan spesífiko di bibienda di diferente grupo di poblashon. Esaki ta hasi posibel pa ofresé ​​solushonnan personalisá pa no laga niun persona kai fo’i dje boto. I lokual bo ta paga na hür bo lo paga pa kompra di bo mes kas.

Jonathan Malagón: E revolushon di “Mi Casa Ya” i e lèsnan krusial pa Kòrsou

Seguidamente a hiba palabra Jonathan Malagón, presidente di Asosashon di Bankonan Colombiano y eks Minister di Bibienda. Den su presentashon yamá “Política di vivienda na Colombia” el a analisá e impakto di “Mi Casa Ya”, un programa di bibienda ku di un forma radikal a kambia akseso na bibienda na Colombia.

Malagón a splika kon e maneho aki no solamente a proveé ​​bibienda digno pa míles di famia, pero tambe a stimulá desaroyo urbano i kresementu ekonómiko. El a papia riba e problemanan fundamental den e merkado di bibienda, manera e skarsedat di bibienda pagabel, desigualdat kresiente den akseso na finansiamentu i e konsekuensianan di kresementu urbano deskontrolá.

Despues di un reflekshon profundo, Malagón a presentá tres rekomendashon klave pa implementashon di Mi Kas Awor na Kòrsou:

• Programanan di supsidio mester ta efisiente i impulsá dor dje demanda
– Supsidionan bon diseñá ta prevení inefisiensia i ta sòru pa mas hende tin akseso na nan propio kas.
• Finansiamentu pa medio di hipotek ta un katalisadó pa desaroyo
– Un maneho di krédito aksesibel ta garantisá stabilidat den e sektor i ta stimulá invershonnan den konstrukshon.
• Un polítika di bibienda eksitoso ta rekerí di kombenio públiko-privá (PPP)
– Mester kordiná koperashon entre bankonan, sektor di konstrukshon i gobièrnu pa maksimalisá e impakto di e programanan.

Luis Felipe Henao: Bai pa un maneho integral di bibienda na Kòrsou

A sera e dia ku Luis Felipe Henao, eks Minister di Bibienda di Colombia, ku su presentashon “Pa un maneho integral di bibienda”. Henao a enfatisá ku e éksito di Mi Kas Awor ta dependé di un strategia holístiko ku ta enfoká no solamente riba akseso na bibienda, pero tambe riba e sostenibilidat ekonómiko i sosial di e programa.
A base di e eksperensianan Kolombiano, Henao a mustra kon “Mi Casa Ya” a kontribuí na redusí pobresa, mehorá akseso na servisio públiko i oumentá seguridat den áreanan di residensia. El a suprayá ku Mi Kas Awor no ta un pòst di gastu, sino un invershon den futuro, pasobra ademas di bibienda digno, e ta krea empleo tambe y ta fortifiká e sektor di konstrukshon.

Banda di esei, Henao a presentá un análisis di e impakto di Mi Kas Awor, bisando ku:
• Ku un invershon di ANG 1 bion na supsidio durante e próksimo 10 añanan, e programa lo por oumentá e kobertura di maneho di bibienda ku 182%.
• Pobresa por baha ku 10% komo resultado di mehorashon di bibienda i stabilidat sosial.
• E presupuesto di gobièrnu por subi ku ANG 30 mion anualmente debí na e efektonan ekonómiko di e programa.

Un futuro nobo pa biba na Kòrsou

E evento a klousura ku un diskushon di pènel i un konsenso entre Minister Charles Cooper, Direktor di FKP Arthur Con i e ekspertonan.
E konklushon tabata kla: Mi Kas Awor tin e potensial pa pa trese kambio drástiko den e merkado di bibienda na Kòrsou i mehorá kalidat di bida di míles di siudadano.
Dor di kombiná e “Best Practices” internashonal, finansiamentu sano i un strategia di implementashon efisiente, Mi Kas Awor ta wòrdu posishoná komo un maneho di bibienda ehemplar pa e region. 
E lansamentu di Mi Kas Awor ta marka komienso di un era nobo pa bibienda na Kòrsou. E siguiente reto ta pa tradusí e puntonan di bista i rekomendashonnan aki den akshonnan konkreto ku ta garantisá un futuro mas próspero i inklusivo pa tur hende.