Bishitanan di altu nivel na FKP- CFT i Vicepresidente di Sürnam ta risibí presentashon di Mi Kas Awor

CFT TA RISIBÍ PRESENTASHON DETAYÁ RIBA MI KAS AWOR, PROGRESO FINANSIERO DI FKP I E RUTA PA DESAROYO DI BIBIENDA
Willemstad, 11 di òktober 2026
Djabièrnè, 9 di òktober, Fundashon Kas Popular (FKP) a risibí sekretario di e Kolegionan di Supervishon Finansiero (Cft), señor Han van Midden, huntu ku su delegashon di ekspertonan ku ta atendé e portafolio di Kòrsou.

E bishita, ku tabatin un karakter informativo i tékniko, a konsistí di dos parti prinsipal: un presentashon amplio riba Mi Kas Awor i e progreso finansiero di FKP, siguí pa un rekorido na ocho lokashon ku ta forma parti di e perspektiva pa desaroyo di bibienda na Kòrsou.



Presentashon di Mi Kas Awor

Durante e promé parti di e bishita, ekspertonan lokal di FKP i e ekonomista internashonal ku ta sostené e programa a presentá Mi Kas Awor den detaye.
E presentashon a trata e modelo di e programa, su struktura finansiero, e sifranan relevante i e proyekshonnan pa desaroyo di bibienda na Kòrsou. Atenshon speshal a bai na e manera ku un aporte públiko dirigí por mobilisá krédito bankario, sparmentu familiar i kapital privá di kontratista pa fasilitá kompra di kas pa famianan ku diferente nivel di entrada.

E modelo ta buska uni maneho sosial, responsabilidat finansiero i desaroyo ekonómiko den un programa ku ta duna mas famia un oportunidat real pa bira doño di nan propio kas.



Progreso finansiero i atministrativo di FKP

Cft a risibí tambe un aktualisashon tokante e progreso di FKP pa pone su kuentanan anual atrasá al dia.

FKP a splika ku e proseso ta kanando konforme e desishon konhunto ku Gobièrnu, basá riba konseho di ekspertonan finansiero, pa sigui e trayekto di kompilashon di e kuentanan anual, konosí komo e “samenstellingstraject”.

Segun e planifikashon aktual:

– FKP a finalisá e kuentanan anual di 2015 te ku 2018;
– e kuentanan anual di 2019 i 2020 ta programá pa finalisá promé ku fin di 2026; i
– e kuentanan anual di 2021 te ku 2023 ta programá pa finalisá den e promé kuartal di 2027, den koperashon ku e akountent eksterno.

E trayekto aki ta importante pa fortalesé transparensia, responsabilidat finansiero i e base atministrativo nesesario pa implementá un programa di bibienda riba término largu.



Di presentashon na realidat di tereno

Despues di e presentashon, e delegashon a bishitá ocho lokashon. E meta di e rekorido tabata pa mustra kon e modelo i e proyekshonnan presentá ta konektá ku tereno konkreto, proyektonan den diferente fase i oportunidatnan real pa desaroyo.

E ruta a enserá:

1. Amerikaweg – Ekstenshon Hòfi Moonchi
Un tereno di aproksimadamente 6.251 m². E desaroyo ainda no a kuminsá i e kapasidat di bibienda mester wòrdu determiná durante e preparashon posterior.

2. Wechi – fase 1A i 1B
Un área di aproksimadamente 120 hèktar ku kapasidat pa mas ku 500 bibienda. E diferente parti di e proyekto ta den fase di entrega, finalisashon, preparashon òf inisiativa, ku un planifikashon indikativo entre 2026 i 2028.

3. Tera Kòrá 2B – Kaya Karbonstein
Un lokashon indiká komo punto di inisio di un proyekto di Mi Kas Awor, ku un kapasidat proyektá di 224 bibienda. E proyekto ta den fase di preparashon.

4. Ser’i Papaya – anterior skol Dòdò Palm
Un lokashon futuro ku kapasidat proyektá pa mas ku 72 bibienda, aktualmente den fase di inisiativa.

5. Fortuna Pariba
Un lokashon ku kapasidat proyektá pa mas ku 156 bibienda. E proyekto, relashoná ku rekursonan di e Fondo Europeo pa Desaroyo, ta den preparashon pa pasa pa fase di ehekushon.

6. Sapaté – banda di Nos Welita
Un área di aproksimadamente 2,65 hèktar ku kapasidat proyektá pa mas ku 138 bibienda. E lokashon ta den fase di inisiativa.

7. Área serka Vetter
Un tereno di aproksimadamente 21 hèktar ku kapasidat proyektá pa mas ku 300 bibienda. E desaroyo ta ainda den fase di inisiativa.

8. New Orleans – un kaya lateral di Weg naar Santa Catharina
Un proyekto den fase di preparashon, ku un kapasidat indikativo di aproksimadamente 37 bibienda.

Huntu, e lokashonnan ku tin un kapasidat indiká den e mapa di ruta, ta representá un potensial pa mas ku 1.400 bibienda. E lokashonnan ta den diferente fase: algun ta den preparashon òf desaroyo, miéntras ku otro ainda ta den fase di inisiativa.

Terenonan adishonal pendiente

Ademas di e ocho lokashonnan bishitá, tin aproksimadamente 75 hèktar na Oostpunt i 7,3 hèktar na Zorgendal ku por amplia e reserva futuro di tereno pa Mi Kas Awor.

E proseso pa e área na Oostpunt bin den man di Gobièrnu ainda ta pendiente di finalisashon hurídiko i atministrativo. Pa Zorgendal, FKP a bai di akuerdo den prinsipio ku asignashon desde 2013, pero e akseso formal ainda no a wòrdu kompletá.

E terenonan aki no ta wòrdu presentá komo disponibel na e momento aki. Si e prosesonan pendiente wòrdu finalisá i nan wòrdu poné formalmente na disposishon di FKP, nan por fortalesé e kapasidat futuro pa desaroyo di bibienda.

Perspektiva pa 15 aña

E ocho lokashonnan bishitá ta ilustrá un parti di e portafolio i e ruta pa implementashon di Mi Kas Awor. Nan ta konektá e ambishon di largu plaso ku proyektonan konkreto ku por wòrdu prepará, repartí den fase i realisá gradualmente.

Segun e proyekshon presentá, e portafolio di tereno disponibel —suplementá ku terenonan ku Gobièrnu ainda mester pone formalmente na disposishon di FKP— por krea kapasidat pa desaroyá te ku 13.809 bibienda durante un periodo di 15 aña.

Atraves di Mi Kas Awor, FKP ta aspirá na duna famianan ku diferente nivel di entrada un oportunidat real pa kumpra nan propio kas. Na mes momento, e programa por stimulá konstrukshon, empleo, krédito bankario, sparmentu familiar i aktividat ekonómiko lokal.

E sifranan i fechanan indiká ta proyekshonnan i planifikashonnan indikativo, no resultadonan garantisá. Realisashon ta dependé, entre otro, di disponibilidat oportuno di tereno, infrastruktura, rekursonan finansiero, aprobashon i otorgamentu di supsidionan, pèrmitnan, kapasidat di konstrukshon i kontinuidat di e programa.

E bishita di Cft a brinda un bista integral di e trabou ku ta tumando lugá: for di transparensia finansiero i planifikashon institushonal, te na e terenonan kaminda e perspektiva di bibienda por bira realidat pa famianan di Kòrsou.

Routekaart Cft projectbezoek

Fundashon Kas Popular (FKP)

—————————————————————————————–
­KÒRSOU I SÜRNAM TA KOMPARTÍ VISHON RIBA BIBIENDA DURADERO


Willemstad, 9 di òktober 2026
Den oranan di atardi di e mesun djabièrnè, Fundashon Kas Popular (FKP) a risibí Visepresidente di Repúblika di Sürnam, Dr. Gregory Rusland, huntu ku su delegashon ofisial.

Durante e bishita, Visepresidente Rusland i su delegashon a risibí un presentashon tokante Mi Kas Awor, e programa nobo di supsidio di Pais Kòrsou pa kompra di kas.



Sürnam tambe ta konsiderá programanan duradero pa kanalisá parti di su ingresonan futuro for di sektor di gas i petrolero den desaroyo sosial i ekonómiko, ora e ingresonan aki kuminsá reflehá den presupuesto di e pais.

Mi Kas Awor ta demostrando ku un programa di bibienda por generá un efekto multiplikadó den ekonomia lokal. E ta mobilisá krédito bankario, sparmentu familiar, kapital di kontratista, empleo i aktividat serka proveedónan lokal, miéntras e ta yuda famianan bira doño di nan propio kas.



E interkambio di konosementu i eksperensia entre Kòrsou i Sürnam ta habri porta pa solushonnan duradero ku por transformá rekursonan nobo den patrimonio, trabou i oportunidat pa generashonnan futuro.

Fundashon Kas Popular (FKP)